✍️الريم الهاجري – كاتبة سعودية :
يقولون التربية ما تضيع..
وأنا أقول: التربية ترجع لك وقت ما تحتاجينها.
ربيتهم وأنا لسه في سن صغير.
شلت مسؤوليتهم بدري، وسهرت، وتعبّت، وعلمت، وزرعت فيهم الخير.
كبرت معهم خطوة خطوة… كنت لهم الأم والأب والصديقة.
واليوم؟
اليوم كبروا.
وصاروا هم اللي يشيلوني.
صاروا السند اللي أتكئ عليه يوم احتجت لهم.
في الشدة تعرف مين معاك ومين عليك.
في الشدة يتساقط المتفرجين واحد ورا الثاني، ويبقى بس اللي من ريحة قلبك ومن تربيتك.
خالد وإخوانه…
ما سألوني “وش صار؟” قد ما قالوا “وش نقدر نسوي؟”
ما تركوني لحظة. كانوا ظلي اللي ما فارقني، ويدي اللي اتسندت عليها، وصوتي لما تعبت.
مواقفهم ما تنكتب في سطرين.
كبيرة أكبر من الحبر والورق.
وقفوا سند، وداروا ظهري، وسدوا مكاني، وطيبوا خاطري بكلمة.
والباقي؟
كانوا متفرجين. يتابعون من بعيد.
بس أنا ما أحتاج متفرجين. أحتاج عزوة ربيتها بيدي.
ولما ضاقت فيني ودمعت عيني،
قالوها لي بأعلى صوتهم وبكل رجولة: *”يمه لاتبكين واحنا حولك”*
الكلمة هذي مسحت تعب سنين.
الكلمة هذي قالت لي إن تربيتي ما ضاعت.
جعل عيني ما تبكيك يا خالد انت وإخوانك 😥
قالت لي إن كل سهرة وكل دمعة وكل خوف كان يستاهل.
الله لا يحرمني منهم، ويجعلهم قرة عين لي، ويكتب لهم بكل خطوة سووها معي أجر وعز وخير.
ويحفظ لي عزوتي… خالد وإخوانه.
للتواصل : [email protected]
