✍️ جزاع السهو – كاتب سعودي :
حديث بلهجته الشعبيه الصادقة بين ”حلال” أول ”ومخاسير” هالحين وبدون شروط وتحليل معقَّد و قصور أفراح ومهور..!
“إييه بالله.. صادق في كل كلمة قلتها يا ولدي وجبتها على الجرح! الحين نمشي ونشوف هالبيوت ملايا بنات كل بيت غرقان بأربع وخمس والشباب حاطين إيديهم على خدودهم وش بلاهم ما يتزوجون هالتَّالين…؟! من اول وقتنا كان الزواج عندنا بركة وبلاش ما يكلفنا شي حلال ونخل وتجاره
والنفوس طيبه والبيوت مفتوحة وكانو ياخذون ثنتين وثلاث واذا طَلَّق هذي سنة الله ورسوله وياخذون المطلقة والبنت ولا يخلون حُرمة تقعد في بيت أبوها. الظاهر شباب هالوقت يبون الفلوس ومامعهم شي والمظاهر قاصمه ظهورهم !!!
… هالحين لو تفترّ على البيوت ملايا بنات ومطلقات أربع وخمس وقاعدات ينتظرن نصيبهن…!!!
الظاهر اِنا في آخر الزمن اللي ينطبق فيه كلام النبي صلوات الله وسلامه عليه؟ بما معنى الحديث إن من أشراط الساعة إن يقلّ الرجال وتكثر النساء …الخ الحديث !!!
….ويكمل شيخنا كلامه بامتعاض ..! ”هالتالين ”إذا صُمَل الواحد فيهم خذاله وحدة وبس وقفل الدفتر ..! هذا الوضع هو اللي خلا البيوت تمتلي بالبنات عكس أيام أول يوم كانت النفوس زينة وهالحين انشاءالله ازين ..! لاكن اول كان الرجل ياخذ هذي وياخذ عليهاولو ما حصل نصيب ياخذ غيرهم ومافي ظاهرة هذي كبيره اوهذا شايب المطلقات والبنات ما يجلسون يجيهم نصيبهم !!!
…قاطَعه أحدهم بابتسامة يمازحه وأنت يا عمّ.. ماحولك شي؟ مابالك نية تدلي بدلوك…؟
ضحك شيخنا وعدّل غترته والتفت عليه وعيونه تلامع وقال: أوه! أثرك ما تدري؟ القلب خضر وانا أبوك والعمر مجرد رقم.. تراي قفلت الثلاث وباقي الرابعة بالطريق لو حصلت اللي تداري الشايب..!
نعم كلام واقع أيام اول كان الزواج “بلاش” وما يكلف مثل الآن هالمظاهر الكذابة اللي تقص الظهر. شروط والتزامات ومصاريف مالها أول ولا تالي، هي اللي خلت الشاب ينحاش ويصرف نظر ..! هذا هو السبب الحقيقي والواقعي اللي مخلي هالدُّور ملايا بنات وكل بيت غرقان بأربع وخمس بنات ينتظرون النصيب فهل نراجع حساباتنا ونرجع لبساطة أول
وإلا نظل نشوف بيوتنا تشتكي من العزوف…؟
…وقفه مع ابيات قديمه جدا..!
_لاواهني من ركب حنتور
مثل الذي تركب العمه
_ابي اركبه مع شعاع النور
والاقي الترف واخمه
***********
للتواصل : [email protected]
